Nordisk Quiltetreff!

Det er nyleg kome melding om at Nordisk Quiltetreff i Sarpsborg er avlyst pga. lita påmelding. Du finn meir info på sida til Norsk Quilteforbund

.

Regionstreff i Sogn og Fjordane!

Klubben vår har teke på seg å arrangere eit stort treff for quiltarane i regionen vår! REGIONSTREFF!

Her er invitasjonen som har gått ut til quilteklubbar i fylket vårt og til klubbar som ligg litt nord for oss og litt aust  for oss. Vi har også sendt invitasjon til enkeltpersonar som vi kjenner til, men om nokon les dette og har lyst til å delta, så er dei hjerteleg velkomne!! Sjå då info lenger nede på innlegget her!

Vi har hatt dette arrangementet før, og vi gleder oss til å sjå att "gamle kjende"!

QUILTETREFF

Nordfjord Lappe-og Quilteklubb

inviterer til

Regionstreff for Sogn og Fjordane 6. april 2014 i 

Operahuset Nordfjord 

på Nordfjordeid

Program:

10.00 

Registrering, opphenging av tepper m.m. 

Butikkane opner 

Det vert høve til å kjøpe brødmat og kaffi/te mellom kl. 10.00 og 12.00.

12.00

«Quilting i form og farge»

- foredrag av Kari Rindal Eide.

Etter foredraget vert det bestemt kven som skal arrangere treffet i 2015.

13.00

Middag.

14.30

Utstillinga opnar for publikum. Loddsal, åresal og kafè.

16.15

Trekking av lotteri. 

17.00

Avslutning.

Vi i Nordfjord Lappe – og Quilteklubb håper at riktig mange vil finne vegen til Nordfjordeid denne dagen. 

Vi håper også at mange har produkt dei vil vise fram.

Deltakaravgiftkr.200,- 

Kontant betaling ved inngang.

Prisen inkluderer middag og foredrag.

Bindande skriftleg påmelding innan 15. mars

til Nordfjord Lappe- og Quilteklubb v/

Hilde Strøm Os, Osvegen, 6770 Nordfjordeid 

hildebjorg_os@hotmail.com

Linda Honningsvåg, Hjelle, 6770 Nordfjordeid 

linmaho@gmail.com

NB! Ver vennleg å melde på arbeida innan fristen, slik at vi kan berekne kva vi treng av plass for best mogeleg presentasjon.

VELKOMEN TIL QUILTETREFF!

HER KAN DU FÅ OVERNATTING OM DU TRENG DET:

Overnatting på Nordfjordeid: Nordfjord Hotell Tlf. nr. 57 86 33 33 Kr. 700,- pr. person i dobbeltrom. Kr. 1000,- for enkeltrom.

Bryggen Hotell Tlf. nr. 57 86 06 22 Kr. 645,- pr. person i dobbeltrom. Kr. 790,- for enkeltrom.

Skipenes Gard Tlf. nr. 57 86 08 24 Kr. 1400,- for hytte med fem senger.

Sytips!

På sida til amerikanske Elisabet Hartman ligg det ute ein flott bildeserie der ho viser korleis ho syr ei lita toalettveske.

Ho brukar berre rettsaum til quiltinga, noko som her gjev flott effekt

Sida er kun på engelsk, men med så gode bilder, så treng ein berre å sjå kva ho gjer!

HER kjem du til sida hennar!

Februar!!

Februarmøtet nærmar seg!

Tysdag 4.2 møtest vi att på Stokkenes Gjestegard,.....til kjekt samvær der vi får inspirasjon, får diskutert mønster, stoff og fargar. Vi får sett det siste nye frå dei to butikkane våre, og kanskje også får brukt litt pengar der! Eller berre det å være i lag gjer godt! Slike kveldar er så kjekke på mange måtar, for vi treng denne møteplassen der vi deler vår interesse med andre.

Vi håpar at komande kveld også vert gjevande for medlemmane. 

Aktiviteten vi legg opp til denne kvelden er å sy oss namneskilt. Dette treng vi no når vi skal ha to store arrangement, i vår og neste år! Regionstreffet er i april, så no tenkte vi at også namneskilta våre skal verte ferdige i god tid. 

Vi kjem til å kome med forslag til ein modell som er enkel å lage, den er handsydd. Dette må du ta med deg:

• Stoffrestar, litt lyse og litt mørke, nokre ensfarga, og nokre med smått mønster. Du treng kanskje ikkje meir enn 2-3 stoff, men det er godt å ha noko å velje mellom.
• Tynn kartong, td "pizzaøskje", "majonesøskje"
• Limstift
• Papirsaks og stoffsaks
• Ein liten bit bordfilt (det ferdige namneskiltet blir under 10 cm høgt/bredt)
• Sysaker
• Litt mørkt moulinegarn eller Dmc nr 12 til brodering

Etter kaffipausen har vi tenkt at dei ulike gruppene som vi har sett opp til Regionstreffet, samlar seg til orientering og planlegging. Vi håpar også at dei ulike gruppene vil orientere til alle  om arbeidet sitt sålangt. 

Velkomne!

Her er kalenderblokka vi ein gong laga i klubben. Har du ikkje laga den, så finn du mønsteret HER!

Dongeryveskekurs!!

8. og 9. mars skal vi ha  årsmøtekurset "Dongeryveske" ved Liv Ingunn Holvik frå Gloppen. Sjå kor flotte modellar ho har laga!

Her er to store vesker og to små. Bilda viser begge sidene av veskene, og som de ser så er dei kreativt utsmykka med både lappar og maljar av ulike sortar.

 Her ser de blanke maljar som er festa på.

 Litt hekla pynt, ei brun rose og eit halskjede?? er festa på veska til venstre.

 Knappar og bilder, alt kan brukast til pynt!

Det vert påmelding til kurset på klubbmøtet i februar. Ingun på Primula Design vil skaffe pyntemaljar til å feste på, og sikkert anna som kan passe på ei veske. Om du vurderer å bli med på kurset, så har du tida fram til kursstart til å leite fram skattar til å pynte veskene med.

Samsying!

Denne helga har det gått føre seg samsying med 270 quiltarar! Dei som er medlem i den lukka gruppa Quiltesiden på Facebook, har denne helga fått tilbod om samsying. Ei flott firkanta stoffkorg vart resultatet.
Ideskaparen til dette er Pia Bruvoll som er ei av dei bak Quiltesiden. På bloggen hennar Piasisia har ho lagt ut mønsteret til denne korga.

Om du vil ha tilgang til sida, så søkjer du opp sida og trykkjer på "Bli medlem av gruppa". Du vil få svar innan eit døgn vanlegvis.

Facebookside!

No har vi også oppretta Facebookside! Sida blir mata med stoff frå bloggen. Vi håpar med dette at vi når fram til endå fleire, og erfaringane siste døgnet har vist akkurat dette. Det er også lettare å legge inn kommentarar på Facebooksida.
Inntil vidare så er det ikkje lagt inn nokon begrensingar i kven som kan sjå og kommentere. Om det viser seg at det blir mykje uegna stoff på sida, så lukker vi den og de må bli venner med klubben.

Her kjem du til sida : NLQ facebookside

Medlemsmøte 7.januar

 Årets første medlemsmøte var Quiltekafe, og vi fyllte møtelokalet med 40 spente quiltarar!! Kjekt å møtast att, og praten gjekk rundt borda over mange flotte arbeid ein hadde med seg. Vi hadde det så travelt med både arbeid, auksjon og kaffi at vi nesten ikkje hadde tid til "Vis og fortel". Men vi måtte berre finne plass til litt på slutten av møtet, for vi måtte få vist fram to flotte tepper.

 Dette er eit ekte resteteppe, og vi har erfart at dess fleire restar ein har, dess gladare vert resultatet! Laila  U P er meister for dette.

 I haust hadde vi kurs i Buggy Barn-teknikk, og vi sydde mange av desse flotte hjerteteppa. Her er det julehjerter, Laila S B har sydd dette.

Primula Design hadde som vanleg med mange flotte modellar til mønster som er til sals i butikken. Her er eit nydeleg teppe med teksten:

"Her er rent nok til å beholde helsen, og rot nok til å beholde lykken!"

Denne teksten må vel passe perfekt for oss quiltarar som ikkje kan gå og rydde heile tida???

Kurs "Crazy-quilt løpar"

Om akkurat to veker i dag, torsdag 23.1, arrangerer klubben eit kveldskurs : Løpar/festremse i Crazyquilt-teknikk.  Kurset vert på Stokkenes Gjestegard og er kl 18-22.
Kurset er no fullteikna og vel så det. På siste medlemsmøtet kom dei siste påmelde til, og vi vert heile 23 på kurset!

Slike kortkurs har vore veldig populære i klubben vår, og vi oppmodar medlemmane om å komme med tips til kursleiar Ingun om andre slike kurs de kan tenkjer dykk.
Vi har også fått fleire nye medlemmar i år, og vi lagar gjerne til kurs i teknikkar medlemmane vil lære meir om!

Marie Myklebust frå Gloppen skal lære oss korleis vi skal "blande" fine stoff til blokker. Her er det nok rom for å utfolde seg når Marie har lært oss lure teknikkar!

 Det skal bli skikkeleg kjekt å sjå resultata på kurset, for når vi er over 20 på kurset, så blir det også like mange variantar i fargar og mønster. Og mange tips til oss sjølve om bruk av fargar! Dette gler vi oss til no!

Januar!

Vi har tidlegare hatt kalendarbilder som tema gjennom eit heilt år. Mønster til dette bildet vart delt ut på medlemsmøta, men det ligg også ute link til mønster på bloggen vår. Det vart oppretta ein eigen blogg for dette, KALENDERBLOGGEN!
HER kjem du til mønstersida for JANUAR. Dette rekk du vel å sy denne månaden om du ikkje har gjort det før???

Har du lest Quilteeventyret? No lurer bloggred. på om nokon har laga fleire/ gjort ferdig kalenderbilder sidan sist! Vil gjerne ha fleire bilder til å legge inn på kvar månad, så send inn bilde på epostadressa som står oppe til høgre på bloggen, legg inn på Facebooksida eller ta med på neste klubbmøte!