Avisomtale

Det er kjekt å sjå at Drivhusmessa vår vart lagt merke til. Bilen stod parkert nær hovudgata i Nordfjordeid, og det var nok mange som fekk seg ein god latter av vår "heimesydde bil". 

Avisa Fjordenes Tidende var der også, og med overskrifta i avisa "Her ser du ein heimesydd bil" så fann ein dette innlegget ( kopiert frå nettsida til Fjt) no nyleg:

Nordfjord Lappe- og Quilteklubb vart lagt ekstra godt merke til med sin «quiltebil» på Eidamessa sist helg.

– Ja, vi meinte at dette måtte vi ha, smiler Laila Utnes Piel.

Ho er ein av 54 medlemmer i quilteklubben som hadde salsmesse under Eidamessa.

– Det var Ingunn på Primula Design som ringde meg og spurte om eg hadde ein bil som vi kunne kle inn. Eg tenkte då ein liten leikebil, men nei da. Det skulle vere ein vanleg bil, ler ho.

Quilteklubben fekk dermed låne eit vrak frå Stårheim bilverkstad.

– Vi i klubben snakka om at vi måtte reise på blåtur i den først, ler Haldis Lindset Nesbakk og legg til at klubben har fått ein del kommentarar på bilen dei hadde stilt ut.

Klubben, som dei siste to åra har hatt låvemesse i Leivdalen hadde flytta messa til drivhuset i Hildenes Gartneri.

– Vi har hatt mykje folk innom og det verkar som folk kosar seg, seier Haldis Lindset Nesbakk.

Då kom vi i mål!!!

Etter ei flott og hektisk helg, så kan vi no setje oss ned og være godt nøgde med årets store arrangement!
Helga vart både våt og kald, skikkeleg surt haustver! Men bilen vår klarte seg bra i regnet og vinden, lappane som vi limte på heldt seg på plass, berre 6-7 lappar hadde ramla ned!

Utstillingslokalet vårt var perfekt, vi kunne ikkje ønska oss noko betre. Vi rettar stor takk til familien Hildenes som inviterte oss til det tomme drivhuset, og vi såg at vi kosa oss i kvarandre sitt selskap.

Her er to glade eigarar av Hildenes gartneri, junior og senior Berteig som fekk kjøpt seg kvar si  god og varm Kvikk Lunsj lue på messa vår!

Vi hadde kafe ute under tak der vi serverte natronkaker med brunost på og gode saftige kaker! Reine konditoriet! Og kafegjestane strøymde på. Triveleg!

 Det var lyst og god plass til å både henge opp og å legge ut over borda. Medan regnet tromma på taket, så hadde vi det triveleg inne i lag med imponerte kundar som såg på alle flotte varene vi hadde stilt ut for sal.

Vi hadde også laga til utstilling rundt om på veggane, her hang det store tepper, løparar og veggtepper. Kundane la merke til dei ulike arbeida, og var imponerte over kvaliteten på arbeida og dei såg at her har det gått med mange mange timar!!

 Dei flotte gevinstane våre til lotteriet fall i smak, så loddsalet gjekk unna! Komande veke skal vi ha loddsal på Mega på Nordfjordeid, med trekning laurdag 21.9.

Til slutt vil styret få takke medlemmane for godt dugnadsarbeid, her vart det både baka kaker, gått vakter og rigga opp og ned. Det er tydeleg at dette har vi no god erfaring med!
Premien til oss sjølve no etter dette arrangementet, er det komande kurset om 2 veker! Då skal vi lære å sy hjerteblokker i Buggy Barn teknikk. Vi gler oss no til å sitje i ro ei heil helg og berre sy og sy!!

Velkommen til Drivhusmesse!

Då ynskjer vi velkommen til Drivhusmessa på Nordfjordeid komande helg! Det er Eidamesse denne helga, så det vert nok eit yrande liv i gatene våre!

Her viser nokre av oss i styret dei flotte gevinstane vi har til lotteriet vårt. Dette lotteriet startar under messa og vil forsetje på Mega ut neste veke.

I drivhuset hos Hildenes gartneri vert det stor salsmesse av quiltar, strikka varer, barnekle, og ikkje minst god mat å få kjøpt!