Bilder frå Vestlandstreffet!

Medlem Janne var på Vestlandstreffet forrige helg og har sendt oss mange bilder frå både kurs , utstilling og frå foredrag,  Tusen takk for at ho deler litt av opplevinga derifrå, og som alltid så er slike treff til stor inspirasjon!

Vestlandstreffet har vore eit årleg treff (med få unntak) i over 20 år der quiltarar har samlast til kurs, butikksalg, utstillingar og foredrag. I år var treffet arrangert av Egersund og Jæren quiltelag, og det viser seg at det er ingen som har teke på seg å arrangere verken neste år eller seinare. Opp gjennom åra har vi hatt arrangørar over heile Vestlandet, heilt frå Molde i nord og til Jæren i sør i år.

Det er oppretta ei lukka gruppe på Facebook der alle leiarar i laga på Vestlandet er med, ildsjelene Åsta Martine Helena Desire Øvretveit og Mona Bauge er med, repr frå arrangøren i år og Berit Boye frå Norsk Quilteforbund. Alle desse prøver å påvirke lag på Vestlandet til å arrangere treff i åra framover. Kor stort og korleis ein i framtida skal arrangere, er truleg noko som kvar arrangør må få lov å bestemme. Det skal jobbast litt med vedtektene slik at der ikkje er noko som hindrar lag i å arrangere, heller slik at ein blir freista til å ha eit slikt arrangement!

Tida vil vise om det blir noko, her kan du kose deg med Janne sine bilder, fleire bilder finn du på arrangøren si Facebookside (link lenger oppe).

 Her hadde dei god mat på hotellet ser det ut til!!

 Sjå på denne nydelige quiltinga!!!

Vestlandstreff i Bergen!

No er det kome info om program og kurs til Vestlandstreffet i Bergen på sida deira! Link til sida finn du HER!

Avisomtale

Innlegget under her er henta frå sida til Fjordabladet på Nordfjordeid 13.10.15.

Heim   >   Kultur   >   Dei er klare for tre dagar lappelykke

EI HELG MED SAUM OG INSPIRASJON: F.v. Laila Strand Brekke, Anne Marie Holsvik, Haldis Lindset Nesbakk og Elna Aaning Olsen frå Nordfjord Lappe- og Quilteklubb ønskjer klubbmedlemmer og andre velkommen til Nordfjordeid og Vestlandstreff 2015, ein quiltefestival for heile Vestlandet. (Foto: Maria Hjelle)

Dei er klare for tre dagar lappelykke

KULTUR

Publisert: 13. oktober 2015

Oppdatert: 13. oktober 2015

Komande helg er det Vestlandstreff for quilte­interesserte på Nordfjordeid. Festivalen samlar folk frå heile Sør-Norge til tre dagar saum, saum, saum!

Er du sauminteressert, bør du kjenne di vitjingstid – komande fredag til søndag, når Nordfjord Lappe- og Quilteklubb arrangerer Vestlandstreff 2015.

– Dette er kjempestort. 150 kursdeltakarar er påmelde. I tillegg ventar vi kring 200 som kjem innom. Det kjem folk frå Molde i nord til Stavanger i sør, og vi har derfor valt å gi arrangementet undertittelen «Quiltefestivalen på Vestlandet». Det kjem også kurshaldarar og deltakarar frå Austlandet, Sverige og Danmark. Vi har jobba fram mot komande helg i to år, fortel leiar Anne Marie Holsvik i arrangørklubben, som er vertskap for Vestlandstreff for tredje gong. Sist var i 2006, før det i 2000.

– Utviklande
Saman med Laila Strand Brekke, Haldis Lindset Nesbakk og Elna Aaning Olsen ser Holsvik fram til å sy i lag med likesinna i tre dagar til ende. Alle fire er mangeårige medlemmer i klubben og har site i styret på eit eller anna tidspunkt. Spør ein desse damene, er beskjeden klar: Quilting er ikkje noko ein blir lei av om ein først er bitt av basillen.

– Det er alltid noko nytt ein kan lære, noko nytt ein kan lage. I klubben møtest vi ein gong i veka og diskuterer idear og fortel om prosjekta våre – på den måten gir vi kvarandre inspirasjon. På ein stor treff som dette får vi høve til å utveksle erfaringar med nye folk, lære noko nytt, og ikkje minst hente nye impulsar og idear. På Vestlandstreff er det gode sjansar for å vidareutvikle seg, lovar dei.

Å vise fram eigne arbeid og sjå andre sine er ei viktig kjelde til inspirasjon for quiltarane, og mange brukar mobil og sosiale medium aktivt til å dele bilete. No gler deg seg veldig til ei helg fylt med nye impulsar. (Foto: Maria Hjelle)

Ope for alle
På programmet står 17 kurs med 11 ulike kurshaldarar. Somme går over to dagar, andre går over ein dag og kan kombinerast med andre som gjer det same, og det er også korte kurs på nokre timar for dei som vil innom så mange tema som mogleg. Fleire kurs er på drop-in-basis, slik at ein ikkje treng vere påmeld på førehand.

– Det er ikkje nødvendig å vere medlem i ein klubb for å kome på Vestlandstreff. Alle med ei interesse for å sy er velkomne og vil ha utbyte av å ta turen innom. Om ein ikkje vil gå på kurs, kan ein få med seg utstillinga i fellesareala. Det vert òg sal av kaker og kaffi, og lotteri med flotte premiar som teppe, stoff og symaskiner, lokkar Holsvik.

Fem lappebutikkar
Størstedelen av arrangementet går føre seg på Eid Ungdomsskule, men det blir også utstilling på Nordfjord Hotell, der opningsforedraget til Wenche Wolff Hatling på fredag og festmiddagen for deltakarane på laurdag finn stad.

Wolff Hatling er stoffdesignar og innehavar av Northern Quilts på Steinkjer, ein av fem lappebutikkar som held ope under Vestlandstreff. Dei andre er Trapp ned frå Førde, Sølvi Quiltestudio frå Herøy, og heimlege Lappestua-Eid og Primula Design i Eidsgata.

Dermed skulle det vere unødvendig å uroe seg for å gå tom for tråd.

FAKTA
Vestlandstreff 2015
• 16.-18. okt på Nordfjordeid
• Nordfjord Lappe- og Quilte­klubb er arrangør for tredje gong
• Tre dagar med utstilling, foredrag og kurs for quilte­entusiastar frå Molde i nord til Stavanger i sør
• 17 kurs for 150 påmelde, i tillegg mange drop-in-kurs som er opne for alle

Kurshaldarane:
• Anne Pia Godske ­Rasmussen
• Frøydis Myhre
• Ingeborg Strupstad
• Kari Renolen
• Liv Ingunn Holvik
• Mona Rosvold Bauge
• Patricia Iden
• Randi Røys
• Sylvi Ruud
• Tamara Schultz
• Vigdis Hovden Månsson

Artikkel nr 2 i Norsk Quilteblad!

I siste utgåve av Norsk Quilteblad finn du to artiklar om klubben. Den andre som du finn under her, handlar om kva Vestlandstreff er og blir arrangert. Historikken som er skriven, kom ikkje av seg sjølv. Litt tilfeldig vart det ein liten diskusjon og informasjonsdeling på Facebook, og det vart kontakt med dei som vart med i starten. Håpar at infoen vart rett formidla i artikkelen, og stor takk til damene som i starten laga det så kjekt til at alt berre utvikla seg til det som det er no. Vi håpar at vårt treff til hausten skal føre den gode tradisjonen med kurs og inspirasjon vidare.

Her er artikkelen:

Vestlandstreff 2015!

16.-18 oktober arrangerer Nordfjord Lappe- og Quilteklubb Vestlandstreff på Nordfjordeid. For quiltarar på Vestlandet har dette i mange år vore årets høgdepunkt i quiltemiljøet. Ja så mange år har det blitt at ein i år har 20 års-jubileum!

Historikk

Opphavet til Vestlandstreffet starta i det små på Skogbu på Bømlo i 1995. Initiativtakarane var Solveig Ottesen Blåsternes og Ingunn Espeland.  Dei hadde 4 kurs der. Då hadde dei inga aning om at dette skulle vekse seg så stort som dette arrangementet er i dag. Dei som var der, var enige om at dei måtte gjenta suksessen. Så året etter blei det arrangert på Lakseslottet i Suldal. Deretter vart det i 1997 i Bergen, på Stord i 1998. Med andre ord så sirkla det årlege arrangementet litt rundt i Hordaland før det byrja med arrangement i dei 4 Vestlandsfylka Rogaland, Hordaland, Sogn og Fjordane og Møre og Romsdal.

I 2000 kom arrangementet til oss på Nordfjordeid, neste gong her var i 2006, for så å bli arrangert for tredje gong hos oss i oktober i år.

Om treffet

Måten treffet har blitt arrangert på, har etter kvart gått inn i eit fast mønster. Her skal det være både arbeid, opplevingar og inspirasjon å hente, og det er vel akkurat det vi ynskjer å møtast for.

·      Det er som regel rundt 10 kurs  som går samtidig på eit lite område; td i ein skule, eit hotell og liknande. Nokre kurs varer begge dagane, medan det kan være fleire kortkurs; frå 3 timar til dagskurs.

·      Arrangøren har stor utstilling av eigne quiltar i lokala rundt kursa.

·      Det er gjerne fleire quiltebutikkar til stades med sal av mange ”godsaker”.

·      Demonstrasjon av symaskiner og anna utstyr er eit anna innslag.

·      Foredrag med tema knytt til quilting.

·      Festmiddag laurdag kveld med program av ulik art.

Her er som oftast alt samla på ein plass på dagtid, kurs og matservering går føre seg der, og det blir som å være i ei eiga quilteverd desse timane ein er der.

For kven?

Vestlandstreffet er ope for alle! Tidlegare var det vanskeleg å ha oversikt over kven som dreiv med quilting, då vart invitasjonane sende til quiltelag som igjen informerte sine medlemmer. Dei som sydde ”for seg sjølv” nådde vi ikkje fram til utan at vi tilfeldigvis kjende dei. No er alt blitt mykje enklare når vi har fått Facebook, det ser vi i år på kor mykje besøk det er på sida vår kvar dag. Utviklinga har vore fantastisk teknisk, men også fantastisk for dei som no kan følgje med på nettet kva som skjer av arrangement.

Velkommen til Nordfjord

Då gjenstår det berre å ynskje quiltarar velkomne til treffet vårt i oktober, påmeldingsfristen er 15.6, men om det er ledige plassar etter den tid, så kan ein komme til seinare også!

Mariann L. Hatlenes

Nestleiar /bloggredaktør

Invitasjon er lagt ut!

No er invitasjonen og kursa lagt ut på bloggen til Vestlandstreff!

Info om Vestlandstreffet!

Ta eit besøk på bloggen til Vestlandstreff 2015! For no er det lagt ut mykje info om nesten alle kursholdarar som vi har gjort avtaler med.

Og som de ser, så er det svært mange spennande kursholdarar, ....det kan kanskje bli vanskeleg å velje kva du har lyst til å gå på! Vi legg opp til både korte og lange kurs, så her blir det mogleg for medlemmar å delta på kurs også!

Til deg som planlegg å gå på kurs, tenk over korleis du kan bidra til felles dugnad før og under arrangementet. Det er mange ulike oppgåver som høyrer med, men det skal ikkje hindre deg i å gå på eit kurs! :) Planlegging og diskusjon om arrangementet vert nok tema på alle medlemsmøta no framover våren, så vi håpar at du finn tid til å komme på møta.

Alle bilda er henta frå bloggen til Vestlandstreff 2015, der står det også kven som er meister bak quiltane! Gjer merksam på at bilda under kvar kursholdar er meint til å vise kva den enkelte kursholdar står for. Kva som blir sjølve kurset, kjem vi tilbake til i eit eige innlegg om kursa.

Styret har møte onsdag 28.1, så har du saker vi bør ta opp, må du kontakte leiar eller ein annan i styret.
Info om neste medlemsmøte kjem rundt neste helg.