Vi er i Norsk Quilteblad!

I dag kom Norsk Quilteblad, medlemsbladet til Norsk Quilteforbund. Der er  det med to artiklar om klubben vår!

Temaet i bladet denne gongen er "Vest i landet", og her er både lag, enkeltpersonar, arrangement og butikkar i vest godt representerte.

På side 33 finn du ein artikkel som underteikna har skrive om Vestlandstreff. Her er det samla historikken frå då treffet vart til og fram til no.

På side 58 og 59 handlar det om klubben vår, med overskrifta "Livet hos oss". Når ein sender inn stoff til ein artikkel, så vert det også sendt med bilder av quiltar som medlemmar i klubben har laga. I denne artikkelen ser de Hjerteteppe laga av Laila S.B., stort "Stjerneteppe" laga av Aud L., Dongeryveske laga av Ingebjørg L. U. og av butikkutvalet til Primula Design.

Norsk Quilteblad  fekk nytt og tiltalande design for ei stund sidan, så ein oppmodar alle quilteinteresserte i å bli medlem i Norsk Quilteforbund. Facebookside har dei også fått, den finn du HER.
Om du ikkje har bladet og har lese "Livet hos oss", så finn du artikkelen under her!

Livet i Nordfjord Lappe- og Quilteklubb!

Langt…….

·      Vi har eit langt namn på klubben vår, men når den ligg ved den lange Nordfjorden, så passar det ganske bra.

·      Når vi har møta våre, så er det mange av medlemmane som har lang reise, nokre svært lang! Ho med lengste vegen brukar både ferje og bil, ei reise på rundt 2 timar kvar veg! ”Men det er verdt det”, seier ho og gler seg veldig til kvart møte!

·      Medlemslista vår er lang, talet ligg stabilt rundt 50 kvart år og med stor aldersspreiing. Nokre har vore medlem sidan oppstart, nokre tek pause, nokre går ut og nye kjem inn!

Jubileum.

NLQ er ein aktiv klubb som vart starta i 1995, så i år har vi 20-års jubileum. Dette skal vi feire med tur vest til havet der vi skal ha syhelg i mai med kurs, god mat og kjekt samvær med likesinna!

Medlemsmøta

Medlemmane våre kjem frå heile regionen rundt Nordfjord, frå Sunnfjord og frå Sunnmøre, frå heile 10 forskjellige kommunar! Måten vi driv klubben vår på, gjer at det på kvart medlemsmøte er rundt 35 medlemmar. Vi har møta våre ein gong i månaden på Nordfjordeid, og vi har spurt kva som gjer at dei møter opp så trufast på møta. ”Det er det sosiale samværet”, seier dei, ”den gode maten som matvertane serverer”, ”vi blir inspirerte av å sjå andre sine arbeid!” Og det er nok akkurat dette som gjer at vi trivst så godt i lag. Vi kjenner kvarandre på fornamn, vi prøver å være inkluderande og praten går livleg!

Møta har etter kvart fått eit fast innhold, for som regel får vi lære noko nytt. Det kan være ein teknikk, sying av ulike småting, demonstrasjonar, vi har hatt gjennomgangstema ”stjerner” , ”hjerter” og kalendarblokker gjennom eit år, vi har hatt fordjuping i ”Dear Jane” og ”Baltimore”. Siste året har vi hatt linjalar som tema, og vi har hatt fleire linjalkurs.

På kvart møte er vi så heldige å ha 1-2 quiltebutikkar! Vi reknar Nordfjordeid for å være eit ”Quiltemekka” på Vestlandet, for midt i Eidsgata har vi to quiltebutikkar; ”Primula Design” og ”Lappestua-Eid”, der begge innehavarane også er aktive medlemmar og kursholdarar for oss.

”Vis og fortel” er eitt av høgdepunkta, for her dukkar det opp svært mykje fint. Nokre av medlemmane er svært ”Syaktive”, syr etter kjende mønster, eksperimenterer vidare, og vi har også ei som designer mønster! Ein fantastisk gjeng som inspirerer kvarandre, dei fortel om teknikken, erfaringar, lure tips, og når alle kjenner alle, då er dette eit innslag som er veldig nyttig og lærerikt.

Underteikna er bloggredaktør og fungerer som offisiell fotograf på møta. Etter kvart vart det til at alt som vart vist fram, vart fotografert og lagt ut på bloggen vår; NLQ Photo. Her er fokuset på quilten og teknikken, bilda blir kutta slik at personar ikkje er med. Då er det også mykje kjekkare å publisere bilder på nettet!

På kvart møte har vi også lotteri der vi kjøper gevinstar av ein av butikkane , dette er populære quiltegevinstar, og loddsalet går godt!

Sosiale media

Klubben har hatt blogg sidan 2007 og i fjor fekk vi Facebookside. Det siste fann vi var nødvendig for å nå ut til flest mogleg, og det var eit rett tiltak. Det er mykje besøk på sidene våre, og vi legg vekt på å ha ein ”levande blogg”/FB-side der det skjer litt heile tida. Vi har bilder frå alle klubbmøter og kurs, annonsering av det som skal skje både lokalt og elles i quilteverda, vi deler gode idear frå nettet, oppskrifter på gode kaker frå møta og vi legg ut linkar. Sidene skal være inspiratoren til medlemmane og andre som deler vår interesse.

Mange kurs

Vi har i alle år lagt vekt på å ha mange kurs for medlemmane. Vi har to i styret som har ansvaret for planlegging og gjennomføring av kursa, det meiner vi er

lurt sidan det er både mykje arbeid og ansvar økonomisk med det. Tanken er at om vi skal utvikle oss både teknisk og kunstnerisk, må vi få inspirasjon. Vi har henta kursholdarar frå utlandet, kjende norske og lokale!! Men kurs kostar å arrangere, så vi har laga oss ein ”god sirkel”. Skal vi få medlemmane til å delta på mange kurs, må dei ikkje koste for mykje. Difor har vi lagt opp til å ha ein del dugnadar som gjev inntekter, som igjen sponsar kursa til medlemmane. Og det virkar, for vi har i snitt 4 fullteikna kurs i året!! Vi har hatt kjekke arrangement som ”Låvemesse”, ”Regionstreff” og ”Vestlandstreff” fleire gongar, og medlemmane har stilt opp for klubben. I oktober skal vi arrangere ”Vestlandstreff” for tredje gong, og vi har allereie jobba mykje dugnad med førebuingane til det.

No gler vi oss til hausten då vi skal arrangere Vestlandstreff, og vi reknar med å treffe endå fleire som tryllar med stoffbitar då!

Mariann L. Hatlenes, nestleiar/Bloggred.

Året som gjekk!

2012 er historie, og eg vil tru at mange av oss quiltarar har også skapt litt historie i dette året. Det er ting ein har laga og sett årstalet på, noko ein har vore med på og ting ein har opplevd med ein quiltars auger! I klubben vår går eit quilteår frå den eine sommaren er på hell til den neste er i gang. Vi har faste ting som vi plottar inn på kalendaren gjennom året, så i grove trekk så vert åra våre litt like. Men det er dei gode erfariangane vi tek med oss vidare og byggjer aktiviteten i klubben vår på.

Ein liten årskavalkade om kva vi fekk til i 2012 gjev oss litt å mimre på, og kanskje friskar opp gode opplevingar og mange idear.

I JANUAR hadde vi eit fantastisk kurs "Restetepper" med Nancy Eriksen, vi levde lenge på dette kjekke kurset, og eg trur vi vil ha dette med oss inn i det nye året også Takk til Nancy, så enkelt men så kjekt!!

 Jewel Box

Nierblokk

Det er mange fleire innlegg under januar om du vil sjå meir.

Gjennom Quilteåret 11/12 hadde vi temaet BLOMSTER. På kvart klubbmøte tok vi føre oss ein teknikk som kunne brukast til blomstermotiv, det var både "naturlege" og stiliserte.  I FEBRUAR vart det vist ei "Snøball-blokk" som sett sammen av 4 blokker laga ein enkel blomst.

MARS er årsmøtetid og vi har ein fin tradisjon då. Før årsmøtet samlast alle til ein god og lang frukost på eitt av hotella våre, og etter årsmøtet har vi kurs. Denne gongen var det AnnaKa som heldt kurs med temaet "Sminkepunger og små skrin".

I APRIL  fekk medlemmane prøve seg på Blomster-origami på klubbmøtet.

MAI er tida då vi har Quiltekafè, og på møtet vart det vist Baltimoreblomster. Baltimorekransen er også otivet i logoen vår.

I mai vart det arrangert Nordisk Quiltetreff i Ålborg i Danmark, og frå klubben vår reiste det fleire deltakarar. Dei hadde hatt ei kjekk helg med kurs, foredrag og mange opplevingar. HER har Tiril Sol lagt ut bilder frå turen.

I JUNI har vi alltid koseleg sommaravslutning, denne gongen vart det ikkje vanleg sommaravslutning fordi vi fekk besøk av mange quiltarar frå Molde Quiltelag. Vi laga til ein skikkeleg Sommarfest, og vi hadde vergudane på vår side. Eit utruleg kjekt arrangement for både oss og gjestane.

Vi brukar også å ha blåtur i juni, denne gongen hamna vi i Selje på Doktorgarden der vi fekk foredrag/utstilling med nederlandske Ati Ham-Saas  som bur i Selje. Vi var svært mange medlemmar som reiste denne gongen og vi hadde ei flott oppleving! HER finn du Tiril Sol sitt innlegg om blåturen.

JULI er ferietid, då skal vi slappe av og nyte sol og varme og gjerne ein quilt ute i sommarvarmen. Eit lite kåseri om sommarquilten finn du HER. Bloggred. tek også gjerne imot reisebrev frå quilte-opplevingar, HER og HER er  frå ei utstilling i Sverige som bloggred. har skrive.

AUGUST: Vi brukar som regel å starte opp att første tysdagen i september, men dei to siste åra har vi hatt Låvemesse i Leivdalen.første helga i september No fann vi ut at vi måtte førebu oss litt ekstra i matvegen, difor vart det stor dugnad i august med steiking av ca 550 Natronkaker til kafeen på Låvemessa.

SEPTEMBER starta rett på med stort arrangement: LÅVEMESSE i Leivdalen, i løa hos medlem Aslaug.

Dette bildet er lånt frå bloggen til medlem Tiril Sol, fleire bilder fin du HER.

I OKTOBER kjem vi liksom i full sving med syinga, det er blirr mørkare kveldar og vi held oss meir innandørs. Det er tid for Vestlandstreff for dei som ynskjer å reise dit, i år var det Voss Quiltelag som arrangerte. Årets julekurs var ved Siv Smørdal, det vart eit kort men innhaldsrikt onsdagskurs. HER finn du meir om kurset.

Vi hadde også kurs i NOVEMBER, då var det linjalkurs v/Ingun Vaksdal. Vi lærte bruk av mange ulike linjalar, her ser du blokka som du kan lage med linjalen "Storm at sea".

Fleire bilder finn du HER og på bloggen til Tiril Sol.

DESEMBER månad, då driv nok dei fleste med siste innspurt til julegåver. Mange produkt vert vist fram på julemøtet, men nokre vert sydd i siste liten og vert gitt bort før neste møte i januar!! Her får du ein sniktitt på kva som vart julegåver: HER, HER og HER.

Det var nok mange julegåver blant årets siste "Vis og fortel",HER finn du dei bilda.

Gjennom året har vi også hatt ein kalendarserie, til stitchery eller applikasjon. Ideen er frå medlem Randi Røys, modellane er sydd av henne og mønster får medlemmane på epost eller i brev.

Gjennomgangstema på møta våre sesongen 12/13 er Baltimore. På kvart klubbmøte vert det delt ut eit nytt mønster, og ein vel om ein vil bruke handsaum eller maskinapplikasjon. Vi kjem til å dele ut 9 mønster før vi seier oss ferdige med dette temaet før sommaren.

Som de ser så er vi ein klubb med allsidige aktivitetar og vi har det kjekt i lag. Underteikna har gjennom åra påpeika at det er viktig med møteplassar også for vaksne damer, her kan ein treffe andre med same interesse, og ikkje minst "komme seg ut"! Her treff ein medlemmar i alle aldrar, frå 20-åra til over 70, og vi merkar at  her er vi alle like uansett alder!! Her får vi også inspirasjon av kvarandre og vi lærer stadig noko nytt.

Då ynskjer underteikna alle medlemmer og evt. nye medlemmer velkomne til eit nytt og lærerikt år, og avsluttar med desse orda:

"Det er med kunnskap som med mat, ein treng litt kvar dag"