Blomsterorigami

Sun Rose

På siste klubbmøte var temaet også blomst (tema dette året), denne gongen var det origami i stoff. Origami er eigentleg papirbretting, men som vi ser så går det like fint med stabilt stoff. Vi har tidlegare laga "katedralvindu" i det som vi kallar japansk bretteteknikk, og vi reknar med at desse andre modellane også kjem frå Japan.

I eit tidlegare innlegg skreiv eg om at vi lærte å brette blomsten på bildet under her då vi var i Vikebukt i fjor. Denne blomsten heiter Fennel flower.

Fennell flower

Fennell flower brukt som dekor på toalettveske.

Anne Marie viste oss 2 modellar i denne teknikken, her viser ho Sun Rose.

Vi starta med ein sirkel med diameter ca 20 cm ferdig sydd, bretta inn ca 1,5 inch slik bilder viser her.

Bildet er frå boka som vi har kjøpt.

Deretter snudde vi det og bretta hjørna inn mot midten. Festa med nål og tråd i midten. Så enkelt og så fint!

Vi har kjøpt denne boka og den er berre å anbefale. Her er mange flotte modellar og mønster til ting du kan lage med blomster som dekor.

Her er blomsten brukt som applikasjon i ei blokk.

.....eller som her, 2 blomster dannar omslag til eit lite nålebrev!

Besøk hos Quiltekroken del 2

Her kjem resten av bilda frå besøket hos Quiltekroken i Bergen. Igjen vil bloggred. få takke Mona Bauge for at ho gav lov til å ta bilder. Mange av våre medlemmar i klubben har vore innom butikken hennar, og dei snakkar om den gode atmosfæren det er i denne butikken. Difor er det kjekt å få formidle desse bilda også til dei som ikkje har vore innom butikken enno.

Byen Bergen er kjend for alt regnet, men denne dagen var alle skyer borte, og det stråla av vår over alt. Så denne nydelige vesle applikerte paraplyen på bildet over, var den einaste eg såg denne dagen!
Quiltekroken ligg tett ved Strandkaien i Bergen, der alle hurtigbåtar legg til, så då er denne butikken første stopp for alle quiltarar som kjem med båt. Og rett over Vågen ser vi rett bort på den kjende Bryggen med hus tett i tett. Ein malerisk del av bybildet.

Quiltekroken skal snart ha kurs med Bente Malm, då er det denne syboksen ein får lage.

Påskehøne

Har du ikkje høne til påske, så har du sjansen til å lage deg ei no! I eit tidlegare innlegg linka eg til Red Brolly med mønster til påskehare, i dag dukka det opp eit flott mønster til ei Påskehøne. HER kjem du rett til innlegget med sybeskrivelse og PDF-filer med mønster som du kan laste ned gratis.

Kalendaren viser no april!!

Her er bilde av kalenderblokka for april. Dette skal til slutt bli ein komplett kalendar som ein del av medlemmane er i gang med å sy. Det er kjekt å sy noko i lag, iallefall å bruke same mønsteret, og så ser ein kor likt eller ulikt det blir. Det er Randi Røys som har sydd desse blokkene som vi vil vise gjennom året. Takk til henne for all inspirasjon ho gjev oss!

Mønster, eller rettare sagt teikninga av motivet, vert sendt til medlemmane på epost.

Påskestitchery

Snøen lavar ned på Vestlandet no, så det er kjanskje mange som treng noko koselig påskearbeid å pusle med inne. Bloggred. har nyleg vore på trimtur i snøveret, og det finst ikkje så mykje som eit spor etter påskeharar ute i skogen!!

Men her er råd for dette:

På sida til Red-Brolly dukka denne flotte påskeharen opp. HER er link til innlegget frå 21.mars, der er linkar til nedlasting av 2 PDF-filer med mønster og sybeskrivelse. Dette er ei nålepute og alt er gratis.

Det var på bloggen til Auntiesquaintquilt denne nåleputa først dukka opp, der stod linkar og bildet over her er frå bloggen hennar.

Vil ta med til slutt at det finst mange gratismønster på sida til Red-Brolly, HER er link til ei oversikt.

Besøk hos Quiltekroken del 1

Sist veke var bloggred. ein tur til Bergen, og då er eit besøk på Quiltekroken alltid obligatorisk med på shoppinglista. For dei som har teke hurtigbåten til Bergen, så veit dei at butikken ligg berre 100 m frå landgangen, og då kan ein ikkje unngå å gå inn.......
Det blir alltid litt snoping av stoff når ein er der, men det er alltid kjekt å stige inn i butikken og berre sjå og sjå og sjå! For det heng og ligg flotte modellar på kvar ein ledig plass, fint kombinert med mønster og stoff.

Denne gongen var det eit teppe som fanga merksemda mi spesielt. Det var kanskje ikkje heile teppet eg merka meg først, men måten det var quilta på. Heilt fantastisk flott og tett quilta, så eg måtte spørje Mona meir om dette. Ho fortalde at det var maskinquilta hos Sy.no, eit firma ho varmt anbefaler.

Sjølve teppet er ein BOM som heiter Cottage Charm, og ho har att berre ein pakke. Det rare er at då eg no laurdag var eit besøk hos Primula Design på Nordfjordeid, så hadde ho også akkurat denne BOM-pakken, og berre ein att der også. Så om det no er nokon som vert frista av dette flotte teppet, så finn de 2 på Vestlandet, ein i Bergen og ein på Nordfjordeid!
Eg spurde Mona om å få ta bilder, og som vanleg er ho positiv til dette. Kjekt for butikken at vi vil vise bilder syns ho, men veldig veldig kjekt å få lov å legge ut inspirerande bilder på bloggen. Så tusen takk til deg Mona om du kikkar innom!
Nyt denne fantastiske quiltinga!

Det har nok gått med mange meter quiltetråd til dette teppet!!
Det kjem fleire bilder frå butikkbesøket seinare.

Vestlandstreff til hausten

Det er vår no, og tradisjonen tru, så kjem info om haustens Vestlandstreff på denne tida. Som de ser så er det Voss Quiltelag som er arrangør. HER kjem du inn på sida deira med meir info.

Fleischers hotell

Dette er kopiert frå infosida deira:

Vestlandstreff 2012

Voss quiltelag inviterer til Vestlandstreffet 5.-7. oktober 2012

Quilteinteresserte vert med dette inviterte til å delta på Vestlandstreffet 2012. Voss Quiltelag tilbyr 13 kurs (2-dagarskurs, dagskurs og ”drop-in”kurs).

Hjarteleg velkomen til Voss for ei triveleg og inspirerande syhelg.

Kursstad: Voss ungdomsskule, sentralt plassert i sentrum

Kurshotell: Fleischer’s hotell, tlf 56 52 05 00, Evangervn. 13, v/jernbanestasjonen

Fleischer’s hotell er vårt kurshotell, der me skal ha registrering, foredrag og quiltemiddagen.